٭ التعليم العالي: وزارة من خمسة مبان تخيلوا يا جماعة الخير في هذا الجو ماكو تكييف الله يعين الموظفين، والمضحك أن الجماعة للحين يتصلون بالشركة عشان التصليح وماكو فايدة ترى الموظفين قبل المراجعين خاسو من الرطوبة والغبار.. ولكم الرأي والتدبير.

٭ الطيران المدني: مو عارفين منو المسؤول اللي حاط خطة التصليح والتجديد لمبنى المطار، تصدقون يا جماعة شهر سفر وإجازة الطلبة والمدرسين ورمضان داش علينا يعني الناس بتقبل على السفر لأداء العمرة، ورغم هذا قايمين وصاكين نص المطار حق الزحمة والخيسة والسبب قاعدين انعدل وانصلح المطار، يا جماعة الخير شخبار نوفمبر وديسمبر معاكم ولا ما تعرفون تشتغلون إلا في الحرورة.

٭ «الكويتية»: وما أدراكم ما «الكويتية»، كل يوم نقرأ ونسمع شكاوى عن هذا الأسطول الجوي اللي صار «بوقمارتين» يوصل أسرع منه، تصدقون يا جماعة اللي يقوم بتجميع قصص «الكويتية» يقدر يألف كتاب ويسميه «نوادر جحا مع الكويتية».

مو عارفة شنو أكتب من إيميلات وشنو أخلي من كثر الشكاوى، شوي على «التجارة»، وشوي عن «الصحة»، وشوي على «التربية»، وشوي وشوي لغاية ما صرت أغني أغنية المطرب محمد محيي اللي تقول: «أعاتبك علي ايه؟ ولا ايه؟ ولا ايه»، بس احنا نقول لبعض المسؤولين: «حتعملوا فينا ايه؟ ولا ايه؟ ولا ايه» وسلامتكم.

كلمة وما تنرد: (قال رب احكم بالحق وربنا الرحمن المستعان على ما تصفون) «سورة الأنبياء: 112».

atach_hoti@hotmail.com